නායකත්ව පුහුණුවේ ඛේදනීය අවසානය 
උසස් අධ්‍යාපන අමාත්‍ය එස් බී දිසානායක මහතාගේ මඟ පෙන්වීම යටතේ මේ දිනවල සරසවි නායකත්ව පුහුණු වැඩසටහන් සිදු කරගෙන යනු ලබයි. මෙම නායකත්ව පුහුණුව සරසවි ප්‍රවේශය ලැබූ සියලුදෙනාටම අනිවාර්ය කර තිබේ. සරසවි නායකත්ව පුහුණු කඳවුරක් මාදුරුඔය යුධ හමුදා පුහුණු කඳවුරේද ස්ථාපිත කර තිබේ. එම කඳවුරේ පුහුණුව ලැබූ එක් සිසුවියක් පසුගිය දිනයක අඩි 5ක් පමණ උස තාප්පයකින් පැනීමට යෑමේදී ඇද වැටීම නිසා වම් පාදයේ අස්ථි බිඳීමක් සිදු වී තිබේ. එම කඳවුරේදීම ඇයට දින 2ක් තාවකාලික ප්‍රතිකාර ලබා දී තිබුණත් යහපත් අතට පත් නොවූ නිසා පසුව ඇයව අරලගන්විල රෝහලට ඇතුළත් කර තිබේ. ඇයගේ පාදයේ තත්ත්වය බරපතල වූ නිසා ඇයව පොළොන්නරුව රෝහලට මාරුකර තිබේ.
විසි හැවිරිදි වියේ පසුවන කේ. එස්. සෙව්වන්දී නම් වන මෙම සිසුවිය අනුරාධපුර දේවානම්පියතිස්සපුර, තිසාවැව, වටවන්දාන යන ලිපිනයෙහි පදිංචිව සිටින්නීය. සැත්කමින් පසුව ඇයට මාස තුනක් පමණ යනතුරු පාදය බිම නොතබන ලෙස වෛද්‍යවරු උපදෙස් දී තිබේ. ඇයගේ පියා ජීවතුන් අතර නොමැති අතර මව සුළු රැකියාවකින් සිය පවුල නඩත්තු කරන්නියක් බව දැනගන්නට ලැබේ. දියණියගේ ආවතේව කටයුතු සිදුකිරීමට තිබීම නිසා ඇය දැන් මහත් අසීරු තත්ත්වයකට පත්වී ඇති බව වාර්තා වෙයි.
ඡායාරූප - ලංකාදීප
Post a Comment
Your comment will be visible after approval